Um 1500 félagsmenn AFLs í verkfalli: Ekki alltaf skýrt eftir hvaða samningi starfsmaður er ráðinn
Um 1500 félagsmenn í AFLi Starfsgreinafélagi lögðu niður vinnu á miðnætti í tveggja sólarhringa vinnustöðvun. Tveir starfsmenn sem stöðvaðir voru við vinnu í morgun sögðust ekki vita að þeir ættu að vera í verkfalli.Verkfallið sem hófst á miðnætti nær til starfsmanna sem starfa eftir almenningum kjarasamningi AFLs og Samtaka atvinnulífsins annars vegar og hins vegar þeirra sem vinna eftir þjónustusamningi sem einkum nær til gisti- og veitingahúsa.
Verkfallið leiðir til þess að veitingastaðir, kjöt- og fiskvinnslur og gististaðir eru víða lokanir auk þess sem skortur á ræstingum hefur víða áhrif.
Verkfallsverðir félagsins hafa verið á ferðinni í morgun og stöðvuðu í morgun tvo starfsmenn í ræstingum sem báru því við að þeir hefðu ekki vitað af því að þeir ættu að vera í verkfalli.
Þær spurningar virðast vakna víða og bæði félagsmenn í AFLi, sem starfa eftir öðrum samningum og smærri atvinnurekendur spyrja hvort þeirra starfsmenn eigi að vera í verkfalli.
„Það var þó nokkur ruglingur í verkfallinu á fimmtudaginn en ég held að þetta hafi skýrt mikið þá. Við erum með marga kjarasamninga og það er ekki alltaf skýrt á hvaða kjarasamningi starfsmaður er ráðinn," segir Hjördís Þóra Sigurþórsdóttir, formaður AFLs.
Félagið hefur birt myndir af meintum verkfallsbrjótum frá því á fimmtudag á vef sínum. Fyrirtæki í sorphirðu, flutningum og ræstingum eru þar mest áberandi.
Næsta verkfallslota hefur verið boðuð 19. og 20. maí. Fundað var í deilu Starfsgreinasambandsins og SA í gær en sá fundur bar ekki árangur. Næsti fundur er boðaður á föstudag.
„Samtök atvinnulífsins sendu okkur samningsboð á sunnudag sem þeir hafa kynnt með 20% hækkun dagvinnulauna. Við svöruðum því fyrst í gær og höfnuðum hluta þess sem er langt frá okkar kröfum. Meðal þess sem SA býður er breyting á vinnufyrirkomulagi sem felst í að lengja dagvinnutímabilið og lækka yfirvinnuálagið."
Þá samþykkti trúnaðarráð AFLs á fundi sínum í gærkvöldi að efna til atkvæðagreiðslu um verkfall hjá verslunarmönnum líkt og önnur aðildarfélög Landssambands íslenskra verslunarmanna sem hafa boðað verkfall í áföngum frá og með 28. maí. Um 220 verslunarmenn eru á kjörskrá hjá AFLi.
