Þórsverk átti lægsta boð í brú yfir Eskifjarðará
Þórsverk ehf. í Reykjavík átti lægsta boð í nýja brú á Eskifjarðará en brúin fylgir framkvæmdum við Norðfjarðargöng. Fjögur verk eru á dagskrá Vegagerðarinnar austan lands í ár.Tilboð í brúna sem verður 58 löng bitabrú í þremur höfum voru opnuð um miðjan apríl. Þórsverk bauð 130,9 milljónir en Vélsmiðja Hjalta Einarssonar á Reyðarfirði 156,2 milljónir.
Kostnaðaráætlun hljóðaði upp á 131,4 milljónir. Gert er ráð fyrir að verkinu verði að fullu lokið fyrir 1. október.
Í nýjasta tölublaði Framkvæmdafrétta er einnig farið yfir helstu framkvæmdir í vega- og brúargerð á árinu.
Þar er komið inn á brúna sem og Norðfjarðargöng með vegtengingum sem eiga að vera klár í september 2017.
Á næstunni verða boðnar úr endurbætur á Hringveginum um Heiðarenda á Fljótsdalshéraði, 6,4 km kafli á milli Jökulsár og Heiðarsels, sem á að vera tilbúinn á næsta ári.
Þá er gert ráð fyrir endurbótum á 1 km kafla á Hringveginum um Blábjörg í Álftafirði í sumar.
Forsvarsmenn sveitarfélaga á Austurlandi hafa að undanförnu lýst áhyggjum sínum af takmörkuðum framlögum til viðhalds og nýframkvæmda vega og segja að í ófremdarástand stefni.
Frá brúargerð yfir Norðfjarðará. Mynd: VHE
