Verkfall á álverslóð hefst á hádegi
Verkfall starfsmanna undirverktaka á álverslóðinni í Reyðarfirði hefst á hádegi takist samningar ekki fyrir þann tíma. Samningafundur stendur yfir hjá ríkissáttasemjara en miklar líkur virðast á verkfalli þar sem mörgu er ólokið í samningagerðinni.Verkfallið nær til starfsmanna eftirfarandi fyrirtækja: Brammer, Eimskipafélagið, Fjarðaþrif, Launafl, Lostæri, Securitas, Sjónarás (Gámaþjónustan), VHE.
Verkfallið nær einungis til þeirra starfa sem unnin eru á athafnasvæði verksmiðjunnar og á Mjóeyrarhöfn og til starfsmanna sem vinna að jafnaði 70% eða meira starfs síns vegna verkefna fyrir Fjarðaál.
Í tilkynningu AFLs Starfsgreinafélags segir að félagið muni bjóða fyrirtækjunum undanþágur frá boðuðu verkfalli vegna starfa sem beinlínis tengjast öryggi almennings, umhverfis eða starfsmanna.
