Hafnar ásökunum um tilraunir til verkfallsbrota
Formaður Stjórnendafélags Austurlands segir ekkert hæft í ásökunum AFLs starfsgreinafélags um að 40 nýir félagsmenn hafi gengið í Stjórnendafélagið á aðalfundi þess um helgina til að grafa undan kjarabaráttu verkalýðshreyfingarinnar.„Þessir félagar hafa gengið í gengið í félagið frá síðasta aðalfundi sem var haldinn í apríl á síðasta ári. Yfirlýsing AFLs er alröng," segir Benedikt Jóhannsson, formaður Stjórnendafélagsins.
AFL starfsgreinafélag sendi í gær frá sér yfirlýsingu þar sem segir að grunur sé um að nýju félagsmennirnir hafi gengið í Stjórnendafélagið til að grafa undan samstöðu launafólks í komandi verkföllum.
„Þetta er í takt við það sem forystumenn AFLs hafa haldið fram, að Verkstjórafélagið sé í raun ekki stéttarfélag í kjarabaráttu heldur klúbbur sem sækir allar kjarabætur til baráttu verkalýðsfélaga en leggur ekkert til sjálfur. Alvöru verkalýðsfélög taka ekki við nýjum félögum úr félögum sem standa í vinnudeilu."
Í yfirlýsingu AFLS er bent á að verkfall verkafólks á Austurlandi, sem hefst á hádegi á fimmtudag, sé óháð því í hvaða stéttarfélagi menn séu. AFL sé eina félagið sem geri kjarasamninga um störf verkafólks á svæðinu og því nái verkfallið til verkafólks en ekki félagsaðildar.
Ítrekað er að ekki verði liðið að verkstjórar gangi í störf verkafólks og gripið verði til aðgerða gegn slíkum brotum.
Aðspurður um hvort forsvarsmenn Stjórnendafélagsins muni á einhvern hátt tryggja að félagsmenn þess gangi ekki í störf almennra verkamanna svarar Benedikt að félagsmönnum sé treyst til að meta stöðuna.