Dæmdur fyrir að áreita ellefu ára stelpu í gegnum Skype
Héraðsdómur Austurlands hefur dæmt tvítugan karlmann í fjögurra mánaða skilorðsbundið fangelsi fyrir að áreita ellefu ára stelpu með kynferðislegu tali í gegnum samskiptaforritið Skype.Ákærði og brotaþoli áttu í um þriggja tíma samtali í gegnum forritið í apríl árið 2013.
Í dóminum segir að karlmaðurinn hafi viðhaft „ýmiss konar kynferðislegt tal", ítrekað beðið stúlkuna um að hreyfa vefmyndavélina til og frá þannig að sæist í afturenda hennar, falast eftir að hún heimsækti hann og hann fengi að snerta hana, meðal annars að káfa á afturenda hennar.
Gögn málsins byggjast meðal annars af skriflegum samskiptum þeirra sem fundust við leit í tölvu hans sem var í haldi lögreglu vegna annarrar rannsóknar sem beindist að honum.
Af samskiptunum verður meðal annars ráðið að hann hafi sýnt henni kynfæri sín á meðan hann fróaði sér fyrir framan myndavélina.
Karlmaðurinn játaði brot sitt skýlaust en tók þó fram að hann myndi lítið eftir atvikum þar sem hann hefði verið í mikilli á umræddum tíma. Hann hafi síðan leitað sér meðferðar.
Við ákvörðun refsingar var litið til þess að hann hefði brotið gegn trúnaðartrausti mjög ungrar manneskju í skjóli nokkuð náinna fjölskyldutengsla.
Á móti var litið til greiðrar játningar hans og ungs aldurs.
Hann var því dæmdur í fjögurra mánaða fangelsi skilorðsbundið til tveggja ára. Þá þarf hann að greiða stúlkunni 400 þúsund krónur í miskabætur og tæpar 900 þúsund krónur í málskostnað.