Flutningaskip strandaði í Reyðarfirði: Mikill leki og hætta á mengunarslysi
Akrafell, skip Samskipa, strandaði á skeri við Vattarnes milli Reyðarfjarðar og Fáskrúðsfjarðar á fimmta tímanum í morgun. Mikill leki kom að skipinu og skipverjar hafa verið fluttir um borð í björgunarskip. Allar björgunarsveitir á Austfjörðum voru kallaðar út og rúmum 20 mínútum eftir útkall voru fyrstu björgunarskipin komin á vettvang. Hópar björgunarmanna voru einnig sendir landleiðina á svæðið með fluglínutæki ef á þyrfti að halda. Þyrla Landhelgisgæslunnar var einnig ræst út.
Tólf manns voru um borð í skipinu og hófu skipverjar þegar dælingu úr skipinu en þær höfðu ekki undan. Samkvæmt upplýsingum frá Landsbjörgu hafa átta skipverjar verið fluttir um borð í björgunarskip. Björgunarsveitamenn eru farnir um borð með dælur og fleiri eru á leiðinni.
Hætta er talin vera á olíumengun og hefur Slökkvilið Fjarðabyggðar því einnig verið kallað út. Skipið er engin smásmíði, 137 metra langt, og var á leið til Reyðarfjarðar eftir að hafa siglt frá Reykjavík um Ísafjörð og Akureyri.
Mynd: Úr Reyðarfjarðarhöfn
