Bilun í Sigöldu varð að rafmagnsleysi á Austurlandi: Raftæki skemmdust í spennusveiflunni
Bilun við Sigölduvirkjun hratt af stað keðjuverkun sem olli rafmagnsleysi á Austurlandi aðfaranótt laugardags. Raftæki biluðu eftir spennusveiflur og framleiðsla Fjarðaáls er loks að komast á rétt ról en álverið var án rafmagns í rúma tvo tíma.Þetta kemur fram í yfirlýsingu sem Landsnet sendi frá sér í dag eftir fyrirspurn Austurfréttar um ástæður rafmagnsleysisins fyrr í morgun. Austurfrétt hefur heyrt í nokkrum einstaklingum sem segja rafmagnstæki sín hafa skemmst eða eyðilagst í miklu flökti sem varð á rafmagninu á laugardagsmorgunn.
Truflanirnar í spenninum við Sigöldu byrjuðu rétt fyrir miðnætti á föstudagskvöld. Flutningskerfinu var þá skipt upp ú fjórar eyjur til að halda jafnvægi á byggðalínunni og afhending til stóriðju minnkuð. Landsnetsmenn töldu sig hafa komist fyrir bilunina klukkan hálf fimm um nóttina og kerfið væri komið í eðlilegan rekstur.
Kortéri fyrir fimm varð aftur útleysing á spennunni í Sigöldu. Klukkan fimm var kerfinu aftur, í varúðarskyni, skipt upp í tvennt.
Skömmu síðar varð útleysing á vél í Fljótsdalsstöð og við það lækkaði tíðnin í norðaustureyjunni með þeim afleiðingum að útleysing varð hjá Fjarðaáli í Reyðarfirði. Í tilkynningu Landsnets segir að einnig hafi orðið „vart við rafmagnsleysi hjá fleiri notendum á Austur- og Suðausturlandi" og óstöðugleiki verið um tíma á spennu.
Vegna vandamála sem upp komu við enduruppbyggingu flutningskerfisins tók uppkeyrsla skála Fjarðaáls lengri tíma en ella og var skálinn án rafmagns í yfir tvær og hálfa klukkustund.
Dagmar Ýr Stefánsdóttir, upplýsingafulltrúi Fjarðaáls, segir að starfsemin þar sé að komast í fyrra horf eftir tveggja og hálfs tíma rafmagnsleysið. Enn séu einhver frávik sem fylgjast þurfi sérstaklega með í kerskálanum.
Hún segir fyrirtækið þakka starfsfólki fyrir að ekki varð stærra tjón. Allir hafi brugðist hárrétt við og starfsmenn svarað kallinu, hvort sem um var að ræða dagvinnufólk eða starfsmenn á frívakt.
Í tilkynningu Landsnets segir að ástæðurnar fyrir bilanaröðinni aðfaranótt laugardags sé fyrst og fremst raktar til þess að byggðalínan sé „rekin á þolmörkum." Þær séu því „áminning um mikilvægi þess að styrkja tengingu meginflutningskerfisins milli norður- og suðurhluta landsins."
Almennum notendum, sem telja sig hafa orðið fyrir tjóni vegna straumleysis eða spennusveiflna, er bent á að vera í sambandi við viðkomandi dreifiveitu, sem á Austurlandi mun vera RARIK.
