Tónleikar í Vegahúsinu: Rokkað heima um jólin
Síðastliðinn miðvikudag, 28. desember, voru tónleikar í Vegahúsinu undir yfirskriftinni "Rokkum heima um jólin". Er þetta hluti af árlegri tónleikaröð Vegahússins og var að venju mikið fjör.
Brynjar Þórhallsson reið á vaðið og söng nokkur lög vopnaður kassagítar. Á eftir honum kom Halldór Warén sem söng og spilaði nokkur lög, meðal annars af nýútgefinni plötu sinni. Rokkararnir í Made my mud fylgdu í kjölfarið með kraftmiklu blúsrokki eins og þeim einum er lagið. Hjalti Jón Sverrisson lokaði síðan kvöldinu ásamt fríðu föruneyti.
Eins og áður hefur komið fram stóðu allir flytjendur sig með stakri prýði og virtust áhorfendur skemmta sér vel. Vel mætt var á tónleikana og von er til þess að þessir tónleikar muni stækka enn frekar á komandi árum.
Vert er að benda á að tvær austfirskar hljómsveitir munu á komandi dögum halda útgáfutónleika. Annars vegar er það hljómsveitin Gunslinger, en hún treður upp í Gömlu símstöðinni næstkomandi föstudag ásamt strákunum í Chino. Í kvöld, 29. desember, munu síðan strákarnir í The Cocksuckerband fagna komandi útgáfu ásamt góðum gestum í Gömlu símstöðinni.
Það má því með sanni segja að tónlistarlíf Austurlands iði af lífi þessa dagana. Frekari upplýsingar um komandi tónleika má finna á facebook síðum hljómsveitanna.
