Skeytasendingar vegna snjómoksturs
Bréf hafa seinustu vikur gengið milli sveitarstjórna Djúpavogs- og Breiðdalshrepps. Ástæðan er ályktun sveitarstjórnar Djúpavogshrepps um að færa vetrarþjónustu af Breiðdalsheiði yfir á Öxi.
Á seinasta fundi sínum fyrir jól sendi sveitarstjórn Djúpavogshrepps frá sér ályktun þar sem þess er óskað að minnsta kosti tveir af fimm föstum ruðningsdögum á Breiðdalsheiði verði færðir yfir á Öxi.
Þetta hefur lagst illa í nágranna þeirra á Breiðdalsvík en sveitarstjórnin þar hefur lýstir yfir vonbrigðum sínum og mótmælt því að eina leiðin til að bæta þjónustu í einu sveitarfélag sé að skerða hana í því næsta.
Sveitarstjórn Djúpavogshrepps hefur rökstutt ályktun sína með að þrefelt meiri umferð hafi mælst í október um Öxi en Breiðdalsheiði. Í bókun hennar segir að mikil óánægja sé meðal vegfarenda almennt að geta ekki nýtt sér þá miklu vegstyttingu sem vegleiðin um Öxi sé, sem lokist þrátt fyrir smávægilega snjósöfnun á tveimur stöðum. Bent er á að íbúar Breiðdalshrepps fari frekar um Fáskrúðsfjarðargöng, einkum yfir vetrarmánuðina.
Sveitarstjórn Breiðdalshrepps telur hæpið að hægt sé að leggja til jafns einn mokstursdag á hvorri heiði, enda fjallvegirnir ólíkir. Hún telur það ekki sitt hlutverk að hafa skoðun á hvort auka eða skerða eigi þá þjónustu sem nágrannarnir hafi en ítrekar að þjóðvegurinn um Breiðdalsheiði sé mikilvæg tenging Breiðdælinga við Fljótsdalshérað. Hún bendir einnig á að vegurinn inn Breiðdal og út Skriðdal sé eini vegakaflinn á Hringveginum sem sé með skerta þjónustu.
Bæjarstjórn Seyðisfjarðar hefur lýst yfir stuðningi sínum við áherslur sveitarstjórnar Djúpavogshrepps um snjóruðning á Öxi. Hún ítrekar einnig að nauðsynlegt sé að veginum um Breiðdalsheiði verði haldið opnum.
