Nóg af þorrablótum um að velja á Austurlandi
Ef matur á borð við súra hrútspunga, kæstan hákarl, rengi eða lundabagga er hátt skrifaður hjá Austfirðingum er aldeilis góð tíð í vændum. Ein fjórtán þorrablót og ein góugleði eru skipulögð í fjórðungnum þetta árið samkvæmt úttekt Austurfréttar.
Reyndar er aðeins frjálslega farið með hér að ofan því Fáskrúðsfirðingar hafa þegar tekið forskot á sæluna en landsþekkt Hjónaball þeirra fór fram um liðna helgi og tókst þar allt með miklum ágætum. Hjónaballið þó tæknilega ekki þorrablót því þar enginn súrmatur á borðum þó skemmtanahald og gleði þar sé ekki síðri en á þeim blótum sem framundan eru ef marka má söguna.
Það kemur í hlut Reyðfirðinga og Egilsstaðabúa að keyra gleðina í gang og það gerist strax næsta föstudagskvöld þann 26. janúar í íþróttahúsum bæjarbúa. Í fyrrnefnda dæminu um að ræða hvorki meira né minna en 101. þorrablót Reyðfirðinga.
Aðeins sólarhring síðar vandast þó aðeins valið hjá skemmtanaglöðum því laugardagskvöldið 27. janúar fara fram fimm þorrablót á sama tíma eins og sjá má á listanum hér að neðan. Tvö blót til viðbótar verða haldin tæpri viku síðar, 2. - 3. febrúar, blótað á tveimur stöðum til 9. og 10. febrúar áður en þrjú síðustu blótin verða haldin.
Það verða svo Jökuldælar og Hlíðarmenn sem slútta vertíðinni 2024 þann 2. mars í Brúarásskóla sem endranær en þar sem upphaf Góu þetta árið er 25. febrúar er þar um að ræða einu formlegu góugleðina að þessu sinni.
26. janúar:
Reyðarfjörður
Egilsstaðir
27. janúar:
Eskifjörður
Vopnafjörður
Seyðisfjörður
Sveitablót Norðfirði
Borgarfjörður eystri
2. febrúar:
Fellablót
3. febrúar:
Kommablót Neskaupstað
Djúpavogur
9. febrúar:
Eiðablót
10. febrúar:
Fljótsdalur
17. febrúar
Breiðdælingar
24. febrúar:
Skriðdælingar og Vallamenn
Hróarstunga
2. mars:
Jökuldælingar og Hlíðamenn
