Verkmenntaskólinn settur undir berum himni
Rúmlega áttatíu nýnemar eru við Verkmenntaskóla Austurlands sem settur var í blíðviðri í síðustu viku. Nýr skólameistari leggur áherslu á að hver líti eftir öðrum innan skólasamfélagsins.Nýnemar að þessu sinni eru 81 talsins, þar af koma þrjátíu þeirra beint úr grunnskóla, jafn margir og í fyrra.
Þetta var fyrsta skólasetning nýs skólameistara, Elvars Jónssonar sem skipaður hefur verið til næstu fimm ára. Í setningarræðu sinni kvaðst hann vonast til að hið góða bjarta veður endurspeglaði þá birtu sem ríki í skólastarfinu í vetur.
Í tilefni sólskinsins var skólasetningin haldin undir berum himni í fyrsta skipti í sögu skólans.
„Þetta er líka táknræn athöfn því í býgerð er að stækka nemendaaðstöðu skólans þ.e aðstöðu nemenda til félaglífs. Sú stækkun á eimitt að koma út frá núverandi aðstöðu og því kemur viðbyggingin þar sem skólinn er nú settur.“
Í ræðu sinni lagði Elvar áherslu á að allir þeir sem væru innan veggja skólans þyrftu að leggja sitt af mörkum til að mynda gott samfélag.
VA hefur undanfarin ár tekið þátt í verkefninu heilsueflandi framhaldsskóli en þema vetrarins er geðrækt.
„Hjálpumst að við að eyða þáttum eins og einelti, baknagi og öðrum ónotum úr okkar samfélagi – það er raunhæfur möguleiki í okkar litla og notalega skólasamfélagi sem VA er,“ sagði Elvar eftir að hann hafði gert hlé á ræðu sinni fyrir faðmlögin.
„Verum umburðarlynd og nærgætin við erum öll á sama bátnum og berum sameiginlega ábyrð á því að hann komist heill til hafnar með þar sem öll áhöfnin er heil á húfi.“
