Vilja næga fjármuni til að ljúka rannsóknum
Bæjarstjórn Seyðisfjarðar skorar á Alþingi og ríkisstjórn að nú þegar verði skilgreindir nægir fjármunir til að ljúka rannsóknaráætlun vegna Fjarðarheiðaganga í samræmi við samgönguáætlun 2015-2018.
Þetta kemur fram í ályktun bæjarstjórnar sem samþykkt var á síðasta fundi hennar.
Framlög til vegamála í fjárlögum ársins 2017 voru mun minni en gert var ráð fyrir í samgönguáætlun og með hliðsjón af óvissu um framhald verkefnisins vegna óskilgreindra fjárheimilda í fjárlögum telur bæjarstjórnin brýnt að tryggt verði að vinna við þetta mikilvæga samgönguverkefni verði ekki rofin.
Minnt er á að í nefndaráliti meirihluta Umhverfis- og samgöngunefndar Alþingis við samgönguáætlun síðan í haust hafi verið gert ráð fyrir að ljúka rannsóknum vegna Seyðisfjarðarganga og hefja framkvæmdir við þau samhliða gerð Dýrafjarðarganga.
Búið er að bjóða það verk út og á það að hefjast eftir að gerð Norðfjarðargagna lýkur í haust.
Bæjarstjórnin minnir ennfremur á víðtækan stuðning sem Fjarðarheiðargöng hafi hlotið úr öllum landshlutum.