Varað við hálku á Fjarðarheiði
Vegagerðin varar við mögulegri hálku á Fjarðarheiði í fyrramálið og snjókomu á Möðrudalsöræfum í kvöld. Fyrsta kuldakast vetrarins er í kortunum.Spáð er nokkru norðanhreti og snjókomu til fjalla frá því seint í kvöld og fram á morgundaginn.
Varað er við snjó í Víkurskarði og á hringveginum um Mývatnsheiði austur um á Möðrudalsöræfi. Eins er vissara að hafa varann á á Fjarðarheiði í fyrramálið.
Ferðalög suðurleiðina verða hins vegar raunhæfa á ný þar sem gert er ráð fyrir að opna bráðabirgðabrú á Steinavötnum á hádegi á morgun.
Gamla brúin skemmdist í vatnavöxtum í síðustu viku og er aðeins opin fyrir umferð gangandi. Skipulagðar ferðir eru á milli Hala og Hrollaugsstaða milli kl. 08:00 til 20:00. Farið er frá Hala á heila tímanum og á hálfa tímanum frá Hrollaugsstöðum.