Ungt fólk verður að geta leitað sér hjálpar á heimaslóðum
Nauðsynlegt er að efla geðheilbrigðisþjónustu á Austurlandi þannig að ung fólk finni að það geti leitað sér hjálpar á heimaslóðum. Þetta er meðal þess sem fram kemur í ályktunum frá ungmennaþingi sem haldið var nýverið á Fljótsdalshéraði.
Ályktunin kemur í ljósi þeirrar staðreyndar að sjálfsvíg eru algengasta dánarorsök ungra karlmanna á svæðinu.
Þingið telur einnig að enn frekar þurfi að efla jafnréttisumræðu og kynjafræðslu á öllum skólastigum, meðal annars til að sporna við vanlíðan ungs fólks og auka valdeflingu þess.
Rannsóknir sýna að stelpur sem búa úti á landi virðist líða verr en strákum á sömu svæðum. Í ályktun fundarins er því velt inn að það kunni að stafa af íhaldssemi samfélaga og félagsmótun sem ýti undir streitu og vanlíðan.
Þinggestir ræddu að auki um atvinnumarkaðinn á Austurlandi og voru sammála um að fjölbreyttari störf og meiri samkeppni við höfuðborgarsvæðið þyrfti til þess að ungt fólk sem hyggst mennta sig áfram sjái hag sinn í því að búa á Austurlandi að námi loknu.
Að lokum fer þingið fram á að sveitarfélög á Austurlandi leyfi ungmennaráðum og ungu fólki að hafa mun meira að segja á sveitastjórnarstiginu, til að hugmyndir og hugsjónir þess fái sín notið.
