Þykkur rykmökkur yfir stórum hluta Austurlands
Ryksveimur ofan af hálendinu norðan Vatnajökuls liggur nú yfir stórum hluta Austurlands, birgir útsýni og veldur fólki óþægindum.Sól var á lofti í morgun en um hádegið byrjað að þykkna upp í kringum Egilsstaði og dró þá fyrir sólu. Íbúar þar lýsa því hvernig fínt set berist inn um opna glugga eða valdi þurrk í augun um leið og farið sé út.
Gul veðurviðvörun var gefin út fyrir flesta aðra landshluta en Austurlands og Austfirði en það breytir því ekki að víða er hvasst á svæðinu.
Hjá Veðurstofu Íslands fengust þær upplýsingar að á gervitunglamyndum mætti sjá ryksveim liggja ofan af hálendinu norðan Vatnajökuls. Á því svæði sé nú mjög hvass vestanvindur og greinilega orðið þurrt. Skyggni á Egilsstaðaflugvelli var um klukkan þrjú komið niður í tvo kílómetra.
Á meðfylgjandi mynd frá Veðurstofunni má sjá rykmökkinn sem gular rákir. Hann virðist eiga upptök sín inni við Öskju/Kverkfjöll og dreifast þaðan yfir Austurland og Austfirði.
Von er á að rykið liggi áfram yfir fram á nótt. Í kjölfar fyrirspurnar Austurfréttar var gefin út gul viðvörun sem gildir til klukkan níu í kvöld vegna hvassviðris. Varað er við rykmistri, einkum á heiðum og snörpum vindhviðum við fjöll.
