Þrír meiddust í rútuslysi í Víðidal
Þrír farþegar slösuðust lítillega þegar rúta með 25 erlendum ferðamönnum ók aftan á snjóruðningstæki í Víðidal á Fjöllum í dag. Björgunarsveitir aðstoðuð fólkið til byggða sem og fleiri ferðamenn sem voru í vandræðum á Fjöllum.Þrír farþegar kenndu sér meins en ekki svo mikils að þörf væri á sjúkraflutningi og voru þeir því fluttir með björgunarsveitarbílum til skoðunar á heilsugæslustöðinni á Egilsstöðum.
Þangað komu þeir upp úr klukkan hálf sex í kvöld, um svipað leyti og aðgerðum björgunarsveita á slysstað var að ljúka.
Útkallið barst um hálf þrjú í dag og á vettvang fóru félagar frá átta björgunarsveitum frá Aðaldal, Laugum, Mývatni, Húsavík, Vopnafirði, Jökuldal, Fljótdalshéraði og Reyðarfiðri.
Búið er að koma rútunni út af veginum og eru björgunarsveitir á leið í Egilsstaði með aðra farþega. Um borð voru 25 ferðamenn frá Taívan og svo bílstjóri.
Sveinn Halldór Oddsson Zoega í svæðisstjórn björgunarsveitanna á Austurlandi segir brjálað veður hafa verið í Víðidal í dag, blint og hvasst og versnað þegar á leið.
Bæði björgunarsveitarbílar og sjúkrabíll lentu í vandræðum á leið á vettvang. Draga þurfti sjúkrabílinn upp eftir að hann fór út af. „Það var lítið skyggni og menn voru kannski að flýta sér í upphafi meðan ekki var ljóst hvernig staðan var,“ segir Sveinn.
Í bakaleiðinni komu björgunarsveitir fimmtán einstaklingum úr öðrum bílum sem fastir voru í Jökulkinn í skjól í Möðrudal og á Egilsstöðum.
Veginum hefur verið lokað og fram kemur í tilkynningu frá Vegagerðinni að útlit sé fyrir að svo verði næsta sólarhringinn hið minnsta.