Þarf ódýrar íbúðir fyrir þá sem vilja máta sig við landsbyggðina
Hótelstjóri Öldunnar á Seyðisfirði segir ekkert athugavert við að koma upp ódýru húsnæði fyrir þá sem vilji búa út á landi í skemmri tíma. Margir atvinnurekendur hafa þurft að byggja undir starfsfólk sitt.
Þetta kom fram í máli Davíðs Kristinssonar sem var meðal frummælenda á málþingi sem Austurbrú stóð fyrir um húsnæðismál í fjórðungnum nýverið. Hótel Aldan er meðal þeirra fyrirtækja sem þurft hafa að útvega starfsmönnum sínum íbúðarhúsnæði.
„Mér fannst ekki vera hlutverk mitt að taka ábyrgð á þessu en ég hef þurft að gera það,“ sagði Davíð.
Hann sagði markaðinn erfiðan, íbúðarhúsnæði væri almennt ekki á lausu og enginn vildi byggja, eða lána til framkvæmda, meðan byggingakostnaður væri hærri en endursöluverð.
Höggva þurfi á þann hnút. „Ég er hlynntur því að hér séu einhvers konar verbúðir. Þær þurfa ekki að vera neikvæðar. Þetta verður samfélag þar sem fólk býr í skemmri tíma.
Við erum með ungt fólk sem langar til að prófa að búa úti á landi en þorir því alveg. Þetta þarf ekki að vera flókið, menn hafa rætt um gámaeiningar.“
Davíð þekkir húsnæðismarkaðinn á svæðinu af eigin raun því hann flutti til Seyðisfjarðar til að reka Ölduna fyrir fimm árum. „Við vildum leigja og bjuggum á fimm stöðum fyrstu fjögur árin.“
Hann sagði ekki eingöngu einstakra fyrirtækja að fást við húsnæðismarkaðinn. „Ég þarf hjálp. Þetta er ekki bara mitt.“