Stöðvarfjörður tekinn inn í Brothættar byggðir
Stöðvarfjörður verður í haust tekinn formlega inn í verkefnið Brothættar byggðir hjá Byggðastofnun. Bæjarstjóri Fjarðabyggðar vonast til að það verði bænum lyftistöng líkt og öðrum austfirskum byggðalögum sem farið hafa þar í gegn.Brothættar byggðir eru verkefni Byggðastofnunar sem, eins og nafnið ber með sér, miðar að því að styðja sérstaklega við ákveðin byggðarlög sem teljast í mikilli vörn varðandi fækkun íbúa.
Upphaflega var sótt um aðgengi Stöðvarfjarðar að verkefninu árið 2014 en þá var Breiðdalsvík tekin inn og síðar Borgarfjörður. Átakinu á Borgarfirði er nú að ljúka og í byrjun sumars barst bæjarstjórn Fjarðabyggðar erindi frá Byggðastofnun þar sem lýst var yfir vilja til að taka Stöðvarfjörð inn næst.
Þessa dagana er verið að skipa verkefnisstjórnina sem í sitja fulltrúar frá Byggðastofnun, Fjarðabyggð, Austurbrú og íbúum. Fulltrúar íbúar verða væntanlega kosnir á íbúaþingi sem verður formlegt upphaf verkefnisins. Ekki er búið að ákveða hvenær það verði haldið en í samtali við Austurfrétt í dag sagði Jón Björn Hákonarson, bæjarstjóri, að horft væri til seinni hluta október.
Hann kvaðst vonast til að verkefnið myndi lyfta Stöðvarfirði líkt og gerst hafi á bæði Borgarfirði og í Breiðdal.
„Við höfum séð Brothættar byggðir skilja eftir sig ýmsa vaxtarsprota hér fyrir austan. Þær hafa veitt innblástur í samfélögin og við væntum þess sama á Stöðvarfirði. Það verður til ákveðinn fókus á þessa byggðakjarna og í bæði Breiðdal og á Borgarfirði höfum við séð standa eftir tækifæri og verkefni sem dafna áfram.“
