Stefán Bogi ætlar ekki að halda áfram
Stefán Bogi Sveinsson, oddviti Framsóknarflokksins í Múlaþingi, hyggst ekki gefa kost á sér til endurkjörs í sveitastjórnarkosningunum næsta vor.Þetta kemur fram í tilkynningu sem Stefán Bogi sendi frá sér á Facebook í dag. Hann tiltekur þar þrjár megin ástæður.
Í fyrsta lagi að hann hafi næsta vor setið í sveitarstjórn í tólf ár. Það sé töluverður tími og eðlilegt að endurnýjun verði.
Í öðru lagi tók hann við í sumar sem forstöðumaður Héraðsskjalasafns Austfirðinga. Hann segir erfitt að ætla sér til lengri tíma að sinna viðamiklu opinberu starfi skjalavarðarins samhliða krefjandi verkefnum í sveitastjórn.
„Ég hef mörg undanfarin ár sinnt hlutastörfum meðfram pólitíkinni en á einhverjum tímapunkti þurfti ég að huga að framtíðar starfsferli á vinnumarkaði. Þó stjórnmálin séu spennandi vettvangur er ekki verjandi gagnvart sjálfum mér og fjölskyldunni að fórna öðrum starfsferli fyrir þátttöku í pólitík.“
Í þriðja lagi nefnir Stefán Bogi að hann vilji eyða meiri tíma með dætrum sínum þremur.
