Starfsfólk Kleinunnar heyrði ekki í brunakerfinu
Starfsmenn í Miðvangi 2-4 á Egilsstöðum, þar sem eldur kom upp í gær, heyrðu margir hverjir ekki í brunakerfinu. Slökkvistjóri segir að athugasemdir hafi verið gerðar við að brunakerfi hússins séu ekki samtengd en ekkert sé ólöglegt við það.
Austurfrétt hefur í kjölfar eldsvoðans í gærmorgun rætt við starfsmenn í húsinu sem segjast hafa heyrt lítið eða ekkert í brunakerfinu.
Baldur Pálsson, slökkviliðsstjóri hjá Brunavörnum á Austurlandi, segir það skýrast af því að fjögur eldvarnakerfi séu í húsinu og þau séu ekki samtengd. Sérkerfi sé fyrir veitingastaðinn Salt þar sem eldur úr kolakerfi breiddist út í loftstokk í gær.
„Hver rekstraraðili hefur sett upp kerfi fyrir sitt svæði, sem er óheppilegt. Við höfum komið á framfæri athugasemdum um að þetta sé svona en það hefur ekkert verið gert í því,“ segir Baldur.
Húsinu, sem heimamenn nefna Kleinuna, er skipt upp í nokkur brunahólf og er eitt kerfi fyrir hvert þeirra. Baldur segir ekkert ólöglegt við að kerfinu séu ekki samtengd, eldvarnirnar hafi verið hannaðar eftir þeim reglum sem voru í gildi þegar húsið var byggt árið 1991.
Þetta fyrirkomulag er þekkt víða um land en Baldur segir það fátítt á starfssvæði Brunavarna, sem ná yfir önnur sveitarfélög Austurlands en Fjarðabyggð og Breiðdalshrepp.
Baldur telur að bruninn í gær hafi komið hreyfingu á hlutina í Kleinunni. „Það varð umræða í gær um að fara að skoða þetta upp á nýtt. Það kom berlega í ljós að það er óþægilegt að kerfin nái ekki til alls hússins þegar eitthvað stórt gerist.“