Seyðfirðingar: Við erum lifandi fólk með blóð í æðum
Seyðfirðingar hvetja þingmenn til að endurskoða áætlanir um niðurskurð í heilbrigðisþjónustu á landsbyggðinni. Jafnframt styðja þeir baráttu Vopnfirðinga gegn lokun hjúkrunarheimilisins Sundabúðar.
Þetta kemur fram í ályktun samstöðufundar sem haldinn var á Seyðisfirði á föstudagskvöld undir yfirskriftinni „Vér mótmælum öll.“
Í ályktunni er mótmælt „harðlega þeirri grófu aðför að búsetu á landsbyggðinni sem birtist í frumvarpi að fjárlögum ríkisins 2011, með harkalegum niðurskurði á fjárframlögum til heilbrigðismála .“
Ekki hafi verið sýnt fram á að niðurskurðurinn hafi þjóðhagslegan sparnað í för með sér heldur virðist um tilflutning á fjármagni og störfum að ræða.
„Í stað þess að fjölga opinberum störfum á landsbyggðinni eins og núverandi stjórnvöld hafa lofað og skrifað í sinn samstarfssamning, skulu þau nú snarlega flutt burt og þjónustan lögð í rúst. Fjölgun opinberra starfa skal einungis verða áfram utan landsbyggðar.“
Fundarmenn segja þá samstöðu þjóðarinnar sem ríkt hafi um jafnan rétt til heilbrigðisþjónustu hafa verið tætta í sundur.
„Aldraðir skjólstæðingar rifnir upp með rótum og fluttir nauðugir hreppaflutningum . Uppsagnir starfsfólks sem hvergi getur farið leggst með fullum þunga á samfélagið sem er veikt fyrir.“
Því er skorað á stjórnvöld og þingmenn að „falla frá atlögu að íbúum landsbyggðarinnar. Við erum lifandi fólk með blóð í æðum en ekki hörð steypa eða legókubbar.“
Þá sendir fundurinn Vopnfirðingum „baráttukveðjur og stuðning fyrir áframhaldandi tryggri heilbrigðisþjónustu við aldraða í heimabyggð í Sundabúð.“