Rekstur Fljótsdalshrepps á núllinu

Hreppsnefnd Fljótsdalshrepps gerir ráð fyrir að rekstur sveitarfélagsins verði við núllið á þessu ári. Stærstu framkvæmdirnar eru á sviði samgöngumála og uppbyggingar í ferðaþjónustu.

Samkvæmt fjárhagsáætlun er gert ráð fyrir að um fimmtíu þúsund króna afgangur verði af heildarrekstri sveitarfélagsins á árinu.

 

Fjárfestingar eru áætlaðar 60,5 milljónir króna. Þar ber hæst 25 milljónir í uppbyggingu Fjallaskarðsskála, tuttugu milljónir í samgöngubætur í sveitarfélaginu og tíu milljónir í uppbyggingu Óbyggðasafns Íslands.

Engin lántaka er fyrirhuguð á árinu. Eignir sveitarfélagsins eru metnar á rúmar 950 milljónir kóna og skuldbindingar á 32,2 milljónir. 

Árið 2011 var tæplega fjórtán milljóna króna afgangur af rekstri sveitarfélagsins. Skuldir hafa síðan þá lækkað um tuttugu milljónir og handbært fé um rúmar fimmtíu milljónir.