Pólska listahátíðin Vor hefst í dag
Pólska lista- og menningarhátíðin Vor/Wiosna verður opnuð í Sláturhúsinu menningarmiðstöð á Egilsstöðum klukkan 18:00 í dag, föstudag.
Fjallað er um málið á heimasíðu Fljótsdalshéraðs. Þar segir að dagana 18.- 28. ágúst yfirtaka pólskir listamenn Sláturhúsið. Hátíðin átti upphaflega að fara fram í vor en sökum COVID var ákveðið að fresta henni þar til nú.
„Nafnið fékk þó að halda sér þar sem orðið "vor" er lýsandi fyrir hugmyndafræðina á bakvið hátíðina,“ segir á heimasíðunni.
Á hátíðinni koma eingöngu fram eða verða sýnd verk eftir pólskt listafólk sem búsett er á Íslandi.
Þeir myndlistamenn sem sýna eru: Agnieszka Sosnowska, Hubert Gromny, Anna Pawlowska, Lukas Bury, Grzegorz Łoznikow, Anna Story, Magdalena Lukasiak, Staś Zawada og Wiola Ujazdowska sem jafnframt er sýningarstjóri.
Síðar um kvöldið verður boðið upp á pólska tónlist í Sláturhúsinu og fyrr um daginn er bæði jóga og málverkasmiðja í boði.
