Opið málþing um byggðamál
„Ég hvet alla sem áhuga hafa að líta við og taka þátt í umræðu um þessi byggðatengdu mál,“ segir Þórarinn Lárusson, formaður Framfarafélag Fljótsdalshéraðs, en félagið heldur í samvinnu við byggðasamtökin Landsbyggðin lifi málþing um byggðamál á Hótel Héraði næsta föstudag.
Málþingið og öllum opið og stendur frá klukkan 14:00 til 17:00. Þrjú erindi eru á dagskrá;
- Erlent samstarf Landsbyggðarinnar lifi – Stefanía Gísladóttir varaformaður LBL og Vigfús Ingvar Ingvarsson, ritari LBL og FF.
- Fiskeldi og byggðir – Gunnar Steinn Gunnarsson, framleiðslustjóri Laxa ehf.
- Matarauður Íslands, helstu verkefni og tækifæri til frekari samvinnu – Oddý Anna Björnsdóttir, verkefnastjóri hjá Matarauði Íslands.
„Heilt yfir er stóra myndin nokkuð góð“
Aðspurður um sína skoðun á stöðu byggðamála á Austurlandi segir Þórarinn; „Hér er ýmislegt búið að gera, bæði stórt og smátt. Mér þykja Austfirðingar duglegir að halda sínum málum á lofti, en hér er fjölbreytt starfsemi. Auðvitað vantar upp á samgöngur á svæðinu eins og annarsstaðar, en í samanburði við aðra landshluta tel að við stöndum okkur vel – heilt yfir er stóra myndin nokkuð góð.“