Norsk loðnuskip með fyrstu loðnuna til Austfjarða
Norska loðnuskipið Fiskebas landaði fyrstu loðnunni á Austfjörðum á föstudag þegar það kom inn til Fáskrúðsfjarðar. Fleiri skip hafa fylgt í kjölfarið, bæði þar og á Norðfirði.
Fiskebas kom aftur í gær og kom því samtals með 350 tonn. Í morgun kom Eros með 650 tonn til Fáskrúðsfjarðar og Kings Bay bíður löndunar með 500 tonn.
Á laugardag kom færeyska skipið Norðingur með 1870 tonn. Þá eru M.Yttestad og Liafjord á leiðinni með samanlagt tæp 300 tonn.
Tveir norskir bátar lönduðu á Norðfirði í gær. Gardar, áður Beitir NK, 300 tonnum og Kings Bay 600 tonnum. Að því er fram kemur í frétt frá Síldarvinnslunni var mikil áta í loðnunni og fór því nánast ekkert af henni til manneldisvinnslu.
Þá hefur Polar Amaroq, sem er í eigu grænlensks dótturfélags Síldarvinnslunnar og var þar áður Gardar, verið á veiðum og fékk 400 tonn austur af Langanesi á föstudag. Með um borð eru rannsóknarmenn frá Hafrannsóknarstofnun. Skipið var í morgun norðvestur af Færeyjum.
Af 57 þúsund tonna loðnukvóta sem veiða má innan íslenskrar lögsögu koma aðeins rúm 11 þúsund tonn í hlut íslenskra skipa. Það er í mörgum tilfellum aðeins ein ferð fyrir skipin og er búist við að þau bíði sem lengst í von um verðmætari loðnu, að því gefnu að lausn náist í kjaradeilu sjómanna.
Norðmenn fá hins vegar um 40 þúsund tonn af loðnukvótanum auk þess sem Færeyingar og Grænlendingar fá einnig skerf af honum.
