Mikið af húsbílum með Norrænu í morgun
Yfir sex hundruð farþegar komu með Norrænu til Seyðisfjarðar í morgun en ferðin var sú fyrsta sem ferjan siglir samkvæmt sumaráætlun. Fullfermi var með ferjunni.Um borð í ferjunni voru 310 bílar og 616 farþegar. Heldur færri fóru með henni út, 150 bílar og 400 farþegar. Norræna stoppaði í þrjá tíma og gekk afgreiðsla hennar vel fyrir sig.
Mikið var um húsbíla í ferðinni og ljóst að hinir hefðbundnu sumarferðalangar voru fyrirferðamestir.
Ferjan er reyndar full stóran hluta ársins, breytingin milli mánaða felst í hve stór hluti eru farþegar og farmur. Í mars, apríl, september og október eru áberandi rútuferðir.
Þá eru um 10 rútur um borð, ferjan stoppar í tvo daga og er farið í dagsferðir á Mývatn og upp í Fljótsdal en að kvöldi komið aftur til Seyðisfjarðar og gist um borð. Í morgun voru aðeins tvær rútur um borð sem eru á leið í vikuferð um landið.
Síðasta ferðin í sumaráætluninni verður þann 23. ágúst.