Gul viðvörun fyrir Austfirði á morgun og hinn
Veðurstofan hefur í þriðja sinn á rúmri viku gefið út gula viðvörun fyrir Austfirði vegna snjókomu og skafrennings. Veðrið gengur ekki niður af alvöru fyrr en um það leyti sem nýárið gengur í garð.Veðurstofan gaf í morgun út viðvörun fyrir Austfirði sem tekur gildi klukkan ellefu í fyrramálið og gildir út fimmudag, 29. desember. Á þessum tíma er spáð norðaustan 13-20 m/s með snjókomu. Búast má við skafrenningi, lélegu skyggni og erfiðum akstursskilyrðum.
Marcel de Vries, veðurfræðingur hjá Veðurstofu Íslands segir að væntanlega gangi fyrst í veðri syðst á svæðinu og þar verði orðið býsna hvasst um hádegið. Um svipað leyti verði farið að hvessa norðar á svæðinu og áfram bæti í vind og úrkomu fram eftir degi.
Hann segir í kortum Veðurstofunnar lítinn mun að sjá milli svæða innan spásvæðisins. Útlit sé fyrir að vindur standi mest úr norðaustri en einnig mögulega norðri.
Fyrir Austurland að Glettingi er spáð 8-13 m/s með éljum eða snjókomu. Heldur hvassara gæti orðið á því svæði á fimmtudag. Skoðað verður á morgun hvort ástæða sé til að gefa út viðvörun fyrir það spásvæði á fimmtudag.
Þótt viðvörunin gildi aðeins út fimmtudag er viðbúið að eftirköstin vari lengur því Marcel segir að ekki dragi úr vindi af alvöru fyrr en seint á föstudag og laugardag.
Víða eru miklir snjóruðningar meðfram vegum og í götum eftir snjókomuna undanfarna viku. Snjórinn er laus í sér og því verður fljótt illfært þegar vind hreyfir þannig að snjó skefur í.
Ofanflóðadeild Veðurstofunnar telur töluverða hættu á snjóflóðum til fjalla á Austurlandi. Snjóflóð féll á veginn um Fagradal í gær sem tafði fyrir að vegurinn væri opnaður. Þá féll lítið flóð í Hólmatindi á Þorláksmessu.