Gistinætur Íslendinga á Austurlandi margfölduðust í júlí
Gistinætur Íslendinga margfölduðust á Austurlandi í júlí miðað við sama tímabil í fyrra. Þetta kemur fram í nýrri Hagsjá Landsbankans. Herbergjanýtingin var einnig best á Austurlandi eða nær á pari við júlí í fyrra.Í Hagsjánni segir að gistinóttum Íslendinga fjölgaði um 674% á Austurlandi og 552% á Norðurlandi í júlí. Til samanburðar var fjölgunin einungis 54% á höfuðborgarsvæðinu og var hún neikvæð um 49% á Suðurnesjum. Þessa fækkun á Suðurnesjum má líklegast rekja til þess að gistinætur Íslendinga þar á síðustu árum hafa fyrst og fremst verið í tengslum við utanlandsferðir þeirra.
Á eftir Austurlandi og Norðurlandi var fjölgunin mest á Suðurlandi, 312% og Vesturlandi og Vestfjörðum 203%.
Hvað varðar erlenda ferðamenn Austurlandi og Norðurlandi dróst fjöldi gistinátta þeirra saman um 78% og var það svipað hlutfall og á öðrum svæðum.
Besta nýtingin
Ennfremur segir í Hagsjánni að það þurfi því ekki að koma á óvart að herbergjanýtingin hafi verið best á Austurlandi og Norðurlandi í júlí. Nýtingin var 73,3% á Austurlandi og 70,8% á Norðurlandi. Þar á eftir voru Vesturland og Vestfirðir með 55,5% nýtingu. Nýtingin var lægst á Suðurnesjum, 29,1% og höfuðborgarsvæðinu, 34,6%.
Nýtingin á Austurlandi og Norðurlandi lækkaði ekki mikið frá fyrra ári en nýtingin í júlí í fyrra var 80,8% á Austurlandi og 78,5% á Norðurlandi. Á öðrum svæðum landsins dróst nýtingin mun meira saman. Mest dróst hún saman á Suðurnesjum og höfuðborgarsvæðinu.
