Fundað í dag um framhaldið á Seyðisfirði
Sérfræðingar Veðurstofu Íslands og almannavarnir funda í dag um stöðuna á Seyðisfirði. Áfram mælist skrið á jarðvegsfleka utan við Búðará.Samkvæmt upplýsingum frá Veðurstofu Íslands er svipuð hreyfing á mælipunktunum í flekunum og verið hefur yfir helgina. Sá sem lengra hefur hreyfst hefur hliðrast um 15 sm. frá því um síðustu helgi.
Lítið rigndi um helgina og takmörkuð úrkoma er í veðurspám næstu daga.
Fundað verður í dag klukkan þrjú um framhaldið og hvað hægt sé að gera varðandi íbúa níu húsa við ána sem rýmd voru fyrir viku í ljósi þess að hreyfingin er stöðug, hvorki vex né minnkar. Tilkynning verður send út eftir fundinn um niðurstöðuna.
