Forsetinn þakklátur fyrir hlýjar móttökur í Fjarðabyggð – Myndir
Þriggja daga opinberri heimsókn hr. Guðna Th. Jóhannessonar, forseta Íslands, til Fjarðabyggðar lauk í gær. Forsetinn kom víða við í heimsókn sinni og segist þakklátur fyrir að hafa alls staðar mætt hlýju, gestrisni og góðvild.„Mér þótti afskaplega vænt um þær hlýju móttökur sem maður fékk, hvar sem maður kom. Mér fannst takast vel hjá skipuleggjendum heimsóknarinnar að vefa saman þá þræði sem þurfa að vera til staðar í öflugu samfélagi, svo sem atvinnulíf, menningu, menntun, heilbrigðisþjónustu og afþreyingu.“
Við fórum frá einum stað til annars þótt mér þyki erfitt og ósanngjarnt að nefna einn stað sem hafi staðið upp úr umfram aðra. Heimsóknirnar í skólanna eru minnisstæðar. Krakkarnir voru hressir og opinskáir en kurteisir og settu á svið atburði sem þeir höfðu undirbúið.
Heimsókn sem þessi gegnir því hlutverki fyrir mig, í þessu embætti, að fræðast um mannlíf, menningu og staðhætti en ég vona líka um leið að heimsóknin hvetji fólk til dáða.
Ég sannfærðist enn frekar um að Fjarðabyggð er öflugt samfélag. Það glímir vitaskuld við vandamál og áskoranir og það er ýmislegt sem ekki er rætt í svona heimsókn enda viðfangsefni stjórnmálanna en ekki forsetans að ráða bót á. Stundum er hægt að snúa smæðinni í styrk. Við hittum hér fólk með marga hatta á höfði og ég held að þessi augljósa þörf fyrir að fólk bjargi sér sjálft eftir besti getu geti eflt samfélagið.
Tilgangur heimsóknar sem þessarar er öðrum þræði sá að fólk finni að það er meira sem sameinar okkur á þessu landi en það sem skilur okkur að,“ sagði Guðni í samtali við Austurfrétt í lok heimsóknarinnar.
Meðal annars var íbúum í Fjarðabyggð boðið á fjölskyldusamkomu með forsetanum í Kirkju- og menningarmiðstöðinni á Eskifirði. Þar afhenti hann sveitarfélaginu gjöf, ljósmynd úr ferð þáverandi forseta, hr. Ólafs Ragnars Grímssonar, til Fjarðabyggðar árið 1999. Sveitarfélagið færði honum á móti Fáskrúðsfjarðarsögu.
Vill setja aðstöðumun barna í íþróttum á dagskrá
Aðspurður um hvernig forsetinn fari þó með þær upplýsingar sem hann færi í heimsókn sem þessari og fylgir þeim eftir nefndir Guðni að forsetinn hafi dagskrárvald og geti rætt málefni sem honum þyki sérstök þörf á.
„Með svona heimsókn fáum við á tilfinninguna hvernig líf almennings er í stórum dráttum í sveitarfélaginu. Síðan geta sérstök málefni verið nefnd við okkur. Í heimsókninni í Alcoa Fjarðaál spjallaði ég góða stund við mann, sem sinnir íþróttastarfi ungmenna. Sá nefndi aðstöðumun landsbyggðar og höfuðborgarsvæðisins vegna ferðakostnaðar.
Við vissum báðir að það er ekki í verkahring forseta en ég hef samt ákveðið að nefna þetta næst þegar ég hitti forseta Íþrótta- og Ólympíusambandsins eða flyt ávarp þar sem íþrótta- og æskulýðsmál ber á góma. Ég hef enga töfralausn en finnst brýnt að við jöfnum aðstöðuna eftir bestu getu. Þetta mál er dæmi um hverju svona heimsókn getur skilað,“ segir Guðni.
Íbúar sjá forsetann oftar
Guðni heimsótti sjúkrahús, öldrunarheimili, skóla, stofnanir og fyrirtæki í ferðinni. „Því verður ekki neitað að þegar ég fer í atvinnufyrirtæki geta vaknað ýmsar spurningar. Sjókvíaeldi er umdeilt en ég kynnti mér starfsemi Fiskeldis Austfjarða og fannst það sjálfsagt. Við vitum líka að harðvítugar deilur voru um virkjanir og verksmiðjuna sem reis en það er líka staðreynd að hér sköpuðust mörg störf, bæði í henni beint en líka í kring og það var fróðlegt fyrir mig að fá upplýsingar um það,“ sagði Guðni.
Dagskráin var stíf enda hafði forsetinn og fylgdarlið hans viðkomu á ríflega 30 stöðum. Tímaáætluninni var ítarlega fylgt. „Það er nauðsynlegt, um leið og áætlun raskast á einum stað gerist það líka annars staðar og maður vill ekki láta fólk bíða eftir sér.
Í grunninn eru þessar heimsóknir svipaðar og þær hafa verið í áranna rás. Þegar fyrstu forsetar lýðveldisins héldu til dæmis austur á firði þá voru það markverðari viðburðir því fólk var þá kannski að hitta forsetann í fyrsta og eina skiptið. Þegar ég fór í skólanna var viðkvæðið oft að við hefðum hist á fótboltamóti eða ég sést í sjónvarpinu.
Það sem er óbreytt og verður vonandi áfram er sú hlýja, gestrisni og góðvild sem ég mæti í þessu hlutverki – og kann sannarlega vel að meta.“
Myndir: Jessica Auer og Haraldur Líndal Haraldsson
