Fjarðabyggð: Styður auglýsingar en kostar þær ekki
Bæjarráð Fjarðabyggðar kemur ekki fjárhagslega að auglýsingum sem birtar hafa verið undanfarna daga þar sem fyrirhugaðar breytingar á fiskveiðistjórnunarkerfinu eru gagnrýnar. Ráðið styður þær hins vegar efnislega.
Þetta kemur fram í tilkynningu sem ráðið sendi frá sér en allmargir höfðu spurt hvort svo væri, sérstaklega í ljósi tengsla formanns bæjarráðs, Jens Garðars Helgasonar, við herferðina sem rekin er út frá vefnum landidogmidin.is en hann er þar kynntur sem talsmaður vefsins.
Í yfirlýsingunni segir að bæjarráðið komi hvorki fjárhagslega að auglýsingunum né hafi frumkvæði að þeim. Það styðji þær hins vegar efnislega.
„Bæjarráð vill jafnframt árétta að breytingar á lögum um sjávarútvegsmál er mikið hagsmunamál fyrir sveitarfélagið, fyrirtæki og íbúa þess og hefur það meðal annars kostað úttekt KPMG á áhrifum frumvarpanna á Fjarðabyggð.“
Í upptalningu á vefnum, sem skráður er á Útvegsmannafélag Austurlands, eru Fjarðabyggð og Seyðisfjarðarkaupstaður á lista yfir þá sem „standa á bak við gerð myndbandanna.“
