Fé fargað á Stórhól fyrir vörslusviptingu
Lögreglan á Eskifirði hefur farið fram á að þrjú hundruð kindur verði
teknar úr vörslu bænda á Stórhóli í Álftafirði á morgun. Fé hefur verið
fargað þar í dag. Nokkrar kindur sem teknar voru fyrir helgi voru
aflífaðar vegna hors.
Ábúendur á Stórhól, Stefanía Lárusdóttir og Jónas Kjartansson, hafa ítrekað hunsað tilmæli hvers konar yfirvalda um að fækka í bústofni sínum eða sinna honum betur. Féð hefur bæði verið vanfóðrað og þröngt á því.
Við talningu fyrir skemmstu kom í ljóst að á Stórhóli og í Hraunkoti í Lóni voru á milli 800-900 kindur. Í framhaldinu var farið fram á að um sjötíu kindur sem geymdar voru í Hraunkoti yrðu teknar úr vörslu eigenda sinna.
Fé fargað í dag
Nokkrar kindur voru aflífaðar vegna hors en um 60-70 kindur voru seldar, samkvæmt heimildum Agl.is.
Lögreglustjórinn á Eskifirði, hefur að kröfu Matvælastofnunar, farið fram á að um 300 kindur verði teknar úr vörslu ábúenda á Stórhóli á morgun. Fé hefur verið fargað á bænum í dag og selt burtu. Á morgun skýrist hversu margt fé verður tekið.
Ítrekaðar athugasemdir
Stórhóll komst fyrst í fréttirnar á sauðburði 2009 en alvarlegar athugasemdir voru þá gerðar búskapinn þar sem féð var illa fóðrað og dauðar skepnur höfðu ekki verið grafnar. Var það þó ekki í fyrsta skipti sem yfirvöld gerðu athugasemdir við aðbúnaðinn á bænum.
Málið fór fyrir dóm þar sem ábúendur voru dæmdir. Stefanía Lárusdóttir, ábúandi, hefur síðan haldið því fram í fjölmiðlum að hún hafi játað á sig illa meðferð á dýrum til að sleppa við frekari málarekstur.
Lítið fækkað
Sveitarstjórn Djúpavogshrepps samþykkti um sumarið að svipta ábúendur leyfi til búfjárhalds en varð að gefa eftir og setja í staðinn sett ströng skilyrði fyrir áframhaldandi leyfi. Fénu, sem þá var yfir 1000 yrði fækkað verulega og fóðrun bætt. Eftir vörslusviptingu var fénu fækkað í 760 kindur og nýr umsjónarmaður gekkst í ábyrgð fyrir búreksturinn fram á vor.
Í desember voru 150 kindur fluttar af bænum áður en til vörslusviptingar kom.
