Eldur í Kleinunni: Stóð tæpt að færi miklu, miklu verr
Enginn teljandi meiðsli urðu á fólki þegar eldur kom upp í loftræstistokki út frá veitingastaðnum Salti í Miðvangi 2-4, svonefndri Kleinu á Egilsstöðum, um hálf ellefu í morgun. Slökkvistjóri segir erfitt hafa verið að ráða við eldinn.
Lögreglu barst tilkynning um mikinn reyk frá húsinu frá vegfaranda rétt fyrir hálf ellefu í morgun. Lögregla byrjaði á að rýma húsið þegar hún kom á staðinn en þar er fjöldi stofnana og fyrirtækja.
Einhverjir voru byrjaðir að fara út úr húsinu en margir virðast hafa haldið að staðan væri vægari en hún var.
Eftir því sem næst verður komist mun hafa logað upp úr kolagrilli á veitingastaðnum og brenndist starfsmaður þar lítillega. Þaðan læsti eldur sig áfram upp loftstokk og barst í annað rými.
„Við urðum að opna mikið og saga í sundur þennan stokk. Það stóð mjög tæpt að ástandið varð ekki miklu, miklu verra,“ segir Baldur Pálsson, slökkviliðsstjóri.
„Það var ekki gott að eiga við eldinn. Hann var aflokaður inni í röri og í því var gríðarlega mikil feiti sem er óeðlilegt. Hún á ekki að geta farið inn í svona miklu magni.
Við urðum fyrir veruleg tjóni á göllum, einhverjir þeirra eru ónýtir eftir að á þá slettist sjóðandi olía og einn slökkvimaður brenndist svolítið á hendi.“
„Allt í kringum stokkinn hitnaði mjög mikið þannig við þurfum að fylgjast með hvort það séu neistar.“
Ekki er ljóst hve mikið tjónið er en það virðist að mestu bundið við rými veitingastaðarins. „Það er greinilegt að það verður rekstrarstöðvun þar um einhvern tíma meðan verið er að koma öllu í lag og endurnýja stokkinn,“ sagði Baldur.