Ein líkamsárás kærð til lögreglu eftir Eistnaflug
Talsverður erill var hjá lögreglu seinni part aðfaranætur sunnudags í Neskaupstað þar sem tónlistarhátíðin Eistnaflug fór fram. Lögregla telur samt hátíðina hafa verið rólega þrátt fyrir mikla ölvun.
Ein líkamsárás var kærð á hátíðinni og í eitt skipti fór lögregla með mann á sjúkrahús þar sem hann var mikið bólginn á fæti og með skurð á höfði. Hann sagðist hafa lent í átökum á tjaldsvæðinu.
Mest var að gera aðfaranótt sunnudags. Þá var einn handtekinn vegna vopnalagabrots en sá sami hafið fíkniefni í fórum sínum. Sömu nótt var meðal annars tilkynnt um stúlku sem gengið hafði í sjóinn.
Vísa þurfti æstum og ölvuðum mönnum út af tónleikasvæðinu en þeir höfðu ekki keypt miða.
Einn ökumaður var handtekinn ölvaður við Egilsstaði en sá var að koma af hátíðinni.
Í tilkynningu lögreglu segir að umferðin hafi gengið vel í gær og gestir hátíðarinnar virst passa sig á að fara ekki af stað of snemma á bílum sínum. Margir ökumenn vildu blása í áfengismæli hjá lögreglu áður en haldið var af stað og sumir frestuðu að því loknu för sinni fram eftir degi.
