Eigendur húsa við fjórar götur á Seyðisfirði geta snúið aftur
Eigendur húsa við fjórar götur á Seyðisfirði geta snúið aftur í kvöld. Þetta kemur fram í tilkynningu frá lögreglunni.
Sérfræðingar Veðurstofu Íslands könnuðu aðstæður í Botnabrún í dag og ekki er að sjá neinar breytingar að ráði frá því fyrir jól. Einnig hefur hreyfing verið mæld daglega og er hún lítil sem engin. Því er talið að stöðugleiki hafi aukist nægilega mikið til þess að hægt sé að aflétta frekari rýmingu, að því er segir í tilkynningunni.
Staðan í farvegi stóru skriðunnar sem féll föstudaginn 18. desember og í nágrenni hennar verður skoðuð frekar á morgun.
Þeir sem eiga hús við neðangreindar götur geta snúið aftur: Botnahlíð, Bröttuhlíð, Baugsveg og Austurveg.
