Banaslys á veginum um Kambanes
Banaslys varð á veginum um Kambanes í gærkvöldi. Ökumaður á fimmtugsaldri fórst eftir að hafa kastast út úr bílnum.
Laust fyrir klukkan níu í gærkvöldi var tilkynnt um alvarlegt umferðarslys á veginum um Kambanes milli Stöðvarfjarðar og Breiðdalsvíkur. Fólksbifreið hafði farið út af veginum og farið nokkrar veltur.
Ökumaðurinn, sem var einn í bílnum, kastaðist út og lést á vettvangi skömmu seinna, að því er fram kemur í tilkynningu frá lögreglunni. Hann var á fimmtugsaldri.
Rannsóknardeild lögreglunnar á Eskifirði fer með rannsókn málsins í samvinnu við rannsóknarnefnd umferðarslysa. Engar frekari upplýsingar verða gefnar að svo stöddu
