13 verkefni björgunarsveita: Þurfti að festa bát á Vopnafirði
Þrettán verkefni voru skráð á austfirskar björgunarsveitir í gær og nótt. Á Vopnafirði þurfti björgunarsveitin að hemja bát sem var að slitna frá bryggju.„Við náðum að koma spottum í hann og binda," segir Jón Sigurðsson, formaður björgunarsveitarinnar Vopna. „Ég hef ekki heyrt af neinu tjóni hér."
Vopnfirðingarnir fóru hins vegar líkt og Jökuldælingar upp á Möðrudalsöræfi þegar verið að var loka veginum þar. „Við vildum hreinsa svæðið áður en við lokuðum og fylgdum nokkrum aftur til byggða."
Sveitirnar aðstoðuðu þar hins vegar erlenda ferðamenn á sunnudag. Tvö útköll komu á nánast sama tíma, annað á Vopnafjarðarheiði en hitt að Jökulkinn þar sem útsýnispallurinn yfir Möðrudal er.
Vegna misskilnings var talið að um eitt útkall væri að ræða og fóru Jökuldælingar til að aðstoðar á Vopnafjarðarheiðinni.
Þremur tímum síðar fóru Vopnfirðingar til aðstoðar ferðamönnunum í Jökulkinn og kom þeim í gistingu í Möðrudal. Þeir voru ögn skelkaðir eftir talsverða bið en að öðru leyti rólegir.
Á tveimur stöðum aðstoðuðu björgunarsveitirnar veitufyrirtæki og á Egilsstöðum var opnað fyrir niðurföll í Bláskógum. Alls tóku 46 manns þátt í aðgerðunum.
„Við sluppum ótrúlega vel," segir Guðjón Már Jónsson, formaður svæðisstjórnar björgunarsveita á Austurlandi.
Mynd: Nikulás Bragason
