Þyrlan reyndi tvisvar að lenda í miðbæ Neskaupstaðar
Þyrla Landhelgisgæslunnar reyndi tvisvar að lenda í Neskaupstað til að sækja sjúkling í gærkvöldi áður en hún varð frá og hverfa vegna veðurs og lenda á Breiðdalsvík. Ný Norðfjarðargöng voru notuð við sjúkraflutninganna.„Þetta gekk ágætlega fyrir rest en stóð lengi og reyndi á marga," segir Guðmundur Helgi Sigfússon, slökkviliðsstjóri Fjarðabyggðar en slökkviliðið sér um sjúkraflutninga í Fjarðabyggð.
Um klukkan þrjú í gær var ákveðið að senda nýbura af Fjórðungssjúkrahúsinu suður til Reykjavíkur. Beðið var um sjúkraflug en þegar aðstæður höfðu verið kannaðar kom í ljós að ekki væri hægt að koma vél austur.
Því var leitað til Landhelgisgæslunnar um að senda þyrlu. Hún hafði farið á loft um hádegi í gær til aðstoðar við leit á Selfossi og þurfti fyrst að fara til Reykjavíkur til áfyllingar og undirbúnings.
Þyrlan flaug meðfram suðurströndinni, tók eldsneyti á Höfn og hélt síðan áfram meðfram Austfjörðum. Um klukkan níu í gær var hún komin til Norðfjarðar en gat ekki lent vegna sviptivinda.
„Þeir reyndu að lenda á planinu í miðbænum en eftir tvær atrennur kom í ljós að það var ekki hægt. Það voru of miklar hviður þennan hálftíma sem þyrlan var hér. Við höfðum gert tvo lendingarstaði klára í bænum en það var verra veður eftir því sem innar dró í firðinum þar sem völlurinn er," segir Guðmundur.
Tveir sjúkrabílar um göngin
Þyrlan fór því aftur á loft og leitaði að hentuðum lendingarstað sunnar á Austfjörðum. Hún reyndi að lenda á Stöðvarfirði en þar var einnig og hvasst. Um klukkan tíu urðu íbúar á Breiðdalsvík varir við mikinn hávaða í bænum. Þar var þyrlan komin og settist niður á flata við skólann.
Á sama tíma voru sjúkraflutningamenn að fara af stað frá Norðfirði í fylgd björgunarsveitarmanna úr Gerpi. Ófært var yfir Oddsskarðið vegna hálku og roks þannig að farið var um hin ókláruðu Norðfjarðargöng.
„Við höfum samning um að nota þau í neyð og lykla að þeim. Verktakarnir eru í jólafríi þannig göngin voru tiltölulega hrein en þar er ekkert samband auk þess sem þau eru myrk þannig að björgunarsveitin fylgdi sjúkrabílnum."
Reyndar fóru tveir sjúkrabílar um göngin í gærkvöldi þar sem annað útkall var í gangi á sama tíma.
Sérhæfður læknir og hjúkrunarfræðingur, sem voru með í þyrlunni, komu á móti sjúkraflutningamönnum á Reyðarfirði þar sem læknirinn tók til við að gera nýburann kláran fyrir flugið.
Þyrlan hóf sig svo á loft frá Breiðdalsvík um klukkan hálf eitt í nótt og lenti við Landsspítalann kortér yfir þrjú. Síðan hefur nýburinn verið í rannsóknum.