Þyrlan farin frá Breiðdalsvík
Þyrla Landhelgisgæslunnar, sem kölluð var út á sjötta tímanum í dag til að sækja veikan nýbura austur í Neskaupstað, hóf sig á loft með sjúklinginn frá Breiðdalsvík á leið til Reykjavíkur um klukkan hálf eitt í nótt.
Í upphafi var gert ráð fyrir að flugið tæki um 6-7 tíma og gert var ráð fyrir eldsneytisstoppi á Höfn á báðum leiðum.
Þyrlan lenti á Höfn rétt rúmlega sjö í kvöld og hélt út fyrir Austfirði. Upp úr klukkan níu var hún komin inn í minni Norðfjarðar og hélt inn fjörðinn þar sem reynt var að lenda á flugvellinum. Það gekk ekki vegna sviptivinda upp á 35 m/s.
Hún hélt því aftur út fyrir firðina og reyndi að lenda á Stöðvarfirði en varð þar einnig frá að hverfa vegna veðurs.
Um klukkan tíu tókst henni að lenda á Breiðdalsvík. Íbúar í þorpinu urðu þá varir við mikinn hávaða og þegar þeir litu út sáu þeir þyrluna vera að setjast niður á flöt rétt hjá skólanum.
Auk þyrlulæknis voru sérhæfður læknir og hjúkrunarfræðingur með í fluginu.
Sem fyrr segir hóf þyrlan sig á loft frá Breiðdalsvík um klukkan tuttugu mínútur fyrir eitt og stefndi til hafs.
Uppfært 01.30: Í tilkynningu sem Landhelgisgæslan sendi frá sér segir að von sé á þyrlunni til borgarinnar „síðla nætur.“ Hún lendir á Höfn til að taka eldsneyti eins og áætlað var.
Þyrlan við skólahúsið á Breiðdalsvík í kvöld. Mynd: Arnþór Ingi Hermannsson
