Allt ónýtt í brúnni eftir brotsjó
Fleiri hundruð lítrar af sjó flæddu um borð í línubátinn Auði Vésteins þegar báturinn fékk á sig brotsjó á þriðjudag. Miklar skemmdir urðu á bátnum.Á vefnum Aflafréttir er greint frá því að báturinn hafi verið í sinni síðustu ferð fyrri jól í nokkuð góðu veðri. Heldur var þó farið að bæta í vind þegar skipverjar voru að leggja af stað í land.
Báturinn var um 10 sjómílur austsuðaustur af Papey þegar gríðarstór hnútur myndaðist framan við bátinn og kom á hann. Við það brotnaði ein rúða í brú og önnur fór alveg úr.
Gríðarlegt magn af sjó fór inn í bátinn og öll tæki í brúnni eyðilögðust, sem og símar þeirra fjögurra áhafnarmeðlima sem voru um borð. Eins komst sjór inn í önnur rými bátsins.
Með varatæki tókst að koma kalli eftir aðstoð til nærstaddra báta og björgunarsveita. Þegar ljóst var að allir fjórir áhafnarmeðlimir væru heilir á húfi og öryggi bátsins tryggt var aðstoð sveitanna afturkölluð.
Auði var siglt til Djúpavogs en hún er gerð út frá Stöðvarfirði. Strax var ráðist í viðgerð á henni og er vonast til að henni verði lokið fyrir áramót.
