Fjölmenni tók á móti Beiti
Norðfirðingar fjölmenntu þegar nýr Beitir sigldi í fyrsta skipti inn Norðfjörðinn fyrir hádegi. Skipið verður til sýnis á sunnudag.
Skipið kom inn að Neskaupstað tíu mínútur yfir ellefu í morgun og sigldi hring meðfram miðbænum.
Þar höfðu bæjarbúar safnast saman til að fagna heimkomu skipsins og fylltu báðar bryggjurnar. Skotið var upp flugeldum á meðan skipið fór hringinn.
Það lagðist svo að ytri bryggjunni þar sem tollverðir fóru um borð til að fara yfir skipið eins og venjan er.
Formleg móttökuathöfn verður klukkan þrjú á sunnudag og til klukkan fimm þann dag verður öllum boðið að skoða skipið í Norðfjarðarhöfn.
Smíði nýja Beitis lauk í Litháen byrjun árs 2014 og er keyptur af danskri útgerð. Skipstjórar á því verða Sturla Þórðarson og Tómas Kárason.
Myndir: Guðbjörg Þorvaldsdóttir