Hækkun fasteignaverðs á Austurlandi dugir ekki á móti hækkun byggingarkostnaðar
Fasteignaverð hefur hækkað minnst það sem af er ári á Austurlandi en hækkunin er þó nokkur á síðustu ár. Fermetraferð íbúðarhúsnæðis í fjórðungnum er það þriðja lægsta á landinu.Þetta kemur fram í nýrri skýrslu greiningardeildar Íslandsbanka um húsnæðisverð á landinu.
Meðalfermetraverð í fjórðungnum er 134 þúsund krónur og hækkaði aðeins um 4,9% fyrstu níu mánuði ársins.
Fermetraverðið eystra hefur hins vegar hækkað um 22,5% frá árinu 2010 sem er í meðallagi. Í Reykjavík hefur það hækkað mest, um 40% en minnst á Suðurnesjum, um 4,5%.
Í skýrslunni er bent á að sú hækkun dugi ekki til að vega upp á móti byggingarkostnaði sem hafi á sama tíma hækkað um 28%.
Dýrustu fjölbýlin eru á Reyðarfirði þar sem fermetrinn seldist á 169 þúsund krónur í fyrra og þau næst dýrustu á Egilsstöðum þar sem verðið var 162 þúsund. Ódýrustu fjölbýlin eru á Seyðisfirði þar sem fermetrinn seldist á 82 þúsund krónur.
Dýrustu sérbýlin eru á Egilsstöðum, 161 þúsund krónur fermetrinn, en þau ódýrustu á Seyðisfiðri þar sem fermetrinn kostaði 63 þúsund.
Í skýrslunni er gerður fyrirvari um að fáir kaupsamningar liggi að baki tölunum.
Þegar þróun fermetraverðs eftir stærð íbúða er skoðuð kemur í ljós að dýrustu íbúðirnar eru á bilinu 0-70 m2 en fermetrinn í slíkum íbúðum kostaði að meðaltali um 156 þúsund krónur fyrstu þrjá fjórðunga ársins 2015. Lægsta fermetraverðið er svo á íbúðum sem eru 210 m2 eða stærri eða um 90 þúsund.
Verð stærstu íbúðanna hefur heldur lækkað síðustu tvö ár eystra en hækkað á þeim minni.
Ódýrast er fermetraverðið á Vestfjörðum, 96.800 krónur en dýrast í Reykjavík, rúmar 315 þúsund krónur. Reykjavík sker sig nokkuð úr á flestum sviðum í greiningunni.
Eystra þarf að meðaltali 2,4 árslaun til að kaupa 100 fermetra íbúð en 6,2 í Reykjavík og 1,8 vestra.
Að meðaltali 2,4 í hverri íbúð á Austurlandi. Fjöldi íbúða helst í heldur við fjölda íbúa í fjórðungnum.
Þegar fyrstu kaup eru skoðuð sést að hæsta hlutfall fyrstu kaupenda er á Suðurnesjum þar sem um 32% kaupsamninga voru vegna kaupa á fyrstu eign en Austurland fylgir þar skammt á eftir.
Greiningardeildin spáir því að íbúðaverð hækki um 7-8% á ári næstu tvö ár.
