Foktjón á bifreiðum ekki bætt
Hvorki Viðlagatrygging né tryggingafélögin tryggja foktjón sem varð á bifreiðum í óveðrinu sem gekk yfir Austfirði síðasta fimmtudagsmorgun.
„Það var mikið tjón á bílum, einkum Stöðvarfirði, sem ekki er bætt,“ segir Hulda Ragnheiður Árnadóttir framkvæmdastjóri Viðlagatryggingar.
Stofnunin stóð fyrir fundum vegna tjóna í óveðrunum eystra á þremur stöðum í gær. Á Stöðvarfirði brotnuðu bæði rúður í bílum vegna foks og lakk skemmdist þegar möl fauk á bílana.
Rúðurnar eru tryggðar með bilrúðutryggingum hjá tryggingafélögunum en ytra byrði bílanna ekki.
„Það eru skilmálar í bifreiðatryggingum að foktjón vegna malar og sands er ekki tryggt og Viðlagatrygging tryggir ekki bíla,“ segir Hulda.
Hún segir fundina í dag bæði hafa verið nýtta til að fara yfir þau tjón sem hægt er að bæta og eins upplýsa fólk um hvaða tjón eru ekki bætt. Hún segir tjónin á bílunum á Stöðvarfirði vera stærst í þeim flokki.
„Miðað við það sem uppi er í dag þá er það tjón sem ekki er bætt og fólk situr uppi með. Þetta er sama og gerðist í gosinu í Eyjafjallajökli, bílarnir urðu sandblásnir og það var ekki bætt. Síðan eru einhver dæmi um að fólk sé ekki með foktryggingar á fasteignum en það er lítið um það.“
Mynd: Arnar Snær Sigurjónsson
