Fyrstu tölur að austan um kvöldmat
Von er á kosningaúrslitum úr Fljótsdal og frá Borgarfirði upp úr klukkan 19:00 í kvöld. Von er á að úrslit af Austurlandi verði orðin ljós fyrir miðnætti.Kjörstað var lokað á Borgarfirði, Seyðisfirði og Fljótsdal nú klukkan 18:00. Á Seyðisfirði fengust þær upplýsingar að kjörsókn hefði verið um 80% sem er ívið minni kjörsókn en fyrir fjórum árum. Von er á fyrstu tölum þaðan undir klukkan tíu í kvöld.
Á Vopnafirði lýkur kjörfundi klukkan átta og von er á fyrstu tölum um klukkustund síðar. Þar er stefnt á að talningu ljúki fyrir klukkan ellefu.
Kjörstaður á Djúpavogi er opinn að minnsta kosti til klukkan átta en 75% kjörsókn var um klukkan 18. Von er á tölum þaðan um klukkan ellefu. Um sama leiti má búast við tölum frá Breiðdalsvík.
Kjörstaðir á Fljótsdalshéraði og Fjarðabyggð eru opnir til klukkan tíu. Von er á fyrstu tölum um leið og þeir loka og lokatölum um klukkan ellefu.
Á Mjóafirði lauk kosningu í minnstu kjördeild landsins klukkan tvö í dag. Þar var 80% kjörsókn en 17 á kjörskrá og um þriðjungur þeirra í kjörstjórn eða varakjörstjórn. Kjörkassinn kom á talningarstað á Eskifirði um kaffileytið.
Austurfrétt verður á vaktinni þar til lokatölur koma.
