Reglur um vaktstöðu í brú ítrekaðar eftir strand Akrafells
Forstjóri Samskipa segir að hafi farið verið yfir öryggisreglur á skipum félagsins eftir að Akrafellið strandaði í mynni Reyðarfjarðar fyrir tæpum þremur árum. Sofandi stýrimaður var talin vera aðalástæðan fyrir strandinu.
„Í kjölfar strands Akrafells var farið yfir þær reglur og verklag sem gilda um vaktstöðu í brú og notkun viðvörunarkerfa og þær ítrekaðar,“ segir Pálmar Óli Magnússon, forstjóri Samskipa í svari við fyrirspurn Austurfréttar.
Austurfrétt spurðist fyrir um hvernig hefði verið brugðist við niðurstöðum skýrslu Rannsóknarnefnda samgönguslysa um strandið hjá Samskipum.
Í skýrslunni segir að aðalástæða strandsins hafi verið að stýrimaðurinn hafi sofnað. Gagnrýnt er að hann hafi verið einn á vakt í brú og öryggiskerfi þar ekki virkjuð.
Í svari sínu segir Pálmar Óli að mikið sé lagt upp úr öryggismálum hjá Samskipum, hvort sem er á landi eða til sjós á þeim um það bil 30 skipum sem séu í þjónustu fyrirtækisins á hverjum tíma.
„Kröfur varðandi skip í millilandasiglingum markast í grundvallaratriðum af alþjóðlegum samþykktum og reglum fánaríkis viðkomandi skips. Samskip leggja metnað sinn í að ofangreindum reglum sé fylgt í hvívetna
Hluti af ofangreindum reglum eru kröfur um öryggismönnun skipa sem fánaríki setur. Í tilviki Akrafells miðuðust þessar kröfur við 11 manna áhöfn. Þegar atvikið átti sér stað voru 13 manns í áhöfn skipsins. Þau skip sem nú sigla á siglingaleið Akrafellsins eru einnig með 13 manna áhöfn.“
Akrafell var skráð á Kýpur þegar slysið varð. Í skýrslu Rannsóknanefndarinnar er bent á að engar alþjóðlegar reglur séu til um vaktstöðu í brú eða notkun öryggistækja þar.
Eins er gerðar athugasemdir við mönnun skipsins. Þótt þrettán hafi verið í áhöfn hafi aðeins einn verið í brúnni þótt verklag um borð í skipinu gerði ráð fyrir tveimur. Skipstjórinn hafði fækkað í brúnni til að hvíla skipverja eftir mikla vinnu meðan skipið var í höfn við ferma og afferma það. Stýrimaðurinn hafði einnig tekið þátt í þeirri vinnu og bar því við að hún hefði enn frekar raskað hvíldartíma hans.