Þungatakmarkanir á vegum á Austurlandi
Færð á Austurlandi er nú víðast hvar sæmileg, nema á fjallvegum, þar sem er hálka og hálkublettir. Að mestu autt með ströndinni. Öxi og Hellisheiði eru ófærar og mikil hálka á Fjarðarheiði og Vopnafjarðarheiði, samkvæmt upplýsingum Vegagerðarinnar. Á Suðausturlandi er greiðfært.
Þungatakmarkanir hafa verið auknar á Austurlandi:
Vegna hættu á slitlagsskemmdum hefur viðauki 1 verið felldur úr gildi og ásþungi takmarkaður við 10 tonn á eftirtöldum vegum á Austurlandi:
Suðurfjarðavegur frá Vattarnesvegi í botni Fáskrúðsfjarðar að Hringvegi í Breiðdal. Hringvegur frá Suðarfjarðavegi í Breiðdal að Höfn.
Veðurspá gerir ráð fyrir norðan og norðaustan 3-10 m/s, en 10-15 NV-lands fram eftir degi. Skúrir, en él norðvestantil á landinu. Úrkomulítið NA-lands síðdegis og víðast hvar í nótt. Vaxandi sunnan- og suðaustanátt á morgun og léttskyjað eða skýjað með köflum, en 10-18 og rigning SV-lands síðdegis. Annars hægari og þurrt. Hiti 0 til 6 stig, en um frostmark norðan til síðdegis.
