Rangfærslur í garð Seyðfirðinga og þingmanna Norðausturkjördæmis
Umræðan • This email address is being protected from spambots. You need JavaScript enabled to view it. • 16. apríl 2014
Á vefmiðlinum austurfrett.is var í gær eftirfarandi haft eftir Jens Garðari Helgasyni, formanni bæjarráðs Fjarðabyggðar:
„Mér skilst að Seyðfirðingar hafi fengið þingmenn kjördæmisins til að lýsa því yfir að þeir styðji ekki fjárveitingu til uppbyggingar ferjuaðstöðu í Fjarðabyggð," segir Jens sem telur þá yfirlýsingu hafa verið „skrýtinn gjörning" bæði af hálfu bæjarstjórnar Seyðisfjarðar og þingmannanna og aftur ranga forgangsröðun af hálfu þeirra fyrrnefndu.
Í ljósi þeirra ótrúlegu fullyrðinga og aðdróttana í garð bæjarstjórnar Seyðisfjarðar og þingmanna Norðausturkjördæmis sem Jens viðhefur, er umrætt bréf birt.
Að auki er eftirfarandi haft eftir formanni bæjarráðs Fjarðabyggðar:
„Fyrir mitt leyti þá er það skýrt forgangsatriði að rjúfa einangrun Seyðisfjarðar en á meðan það er ekki búið að ákveða hvar þau verði þá hef ég það málfrelsi að segja að menn ættu frekar að einbeita sér að Samgöngum heldur en Fjarðarheiðagöngum.
Á það hafa ýmsir sérfræðingar bent. Við verðum að tengja betur saman þetta litla 10.000 manna samfélag sem er á Austurlandi."
Eins og fram kemur í bréfi þingmanna Norðausturkjördæmis hefur Alþingi samþykkt tilraunaboranir vegna Fjarðarheiðarganga svo sem fram kemur í samgönguáætlun. Um er að ræða fjárfrekar rannsóknir sem ekki er að öllu jöfnu farið í nema leiðarval liggi þegar fyrir. Það er nokkuð ljóst að tenging milli Seyðisfjarðar og Fljótsdalshéraðs með Fjarðarheiðargöngum er liður í betri tengingu byggðarlaga á Austurlandi og stór áfangi á þeirri leið; Samgöngum.
Seyðfirðingar hafa ekki gert athugasemdir um legu jarðganga um Fjarðarbyggð heldur stutt Fjarðarbyggð fyrr og síðar sbr. nú síðast Norðfjarðargöng. Að gefnu tilefni færast Seyðfirðingar undan afskiptum forsvarsmanna Fjarðabyggðar á hvern hátt samgöngum til og frá Seyðisfirði verður háttað.
Atburðir og framkoma forsvarsmanna Fjarðarbyggðar í garð Seyðfirðinga undanfarna mánuði gefa ekki tilefni til að fara að ráðleggingum og afskiptum þeirra.
Lesa má bréfið frá þingmönnum með því að smella hér.
Höfundur er bæjarstjóri Seyðisfjarðarkaupstaðar
