Laufey og Örn í Húsey klettarnir í ferðaþjónustunni

Farfuglaheimilið í Húsey, sem Örn Þorleifsson og Laufey Ólafsdóttir reka, fékk nýverið verðlaunin „Kletturinn“ sem veitt eru af Ferðamálasamtökum Austurlands. Verðlaunin eru veitt þeim sem árum saman hafa staðið í framlínu austfirskrar ferðaþjónustu.

 

Örn hefur rekið farfuglaheimilið allt frá árinu 1981 „jafnlengi eða lengur lagt sitt af mörkum við að glæða áhuga erlendra ferðamanna á Austurlandi,“ segir í rökstuðningi fyrir veitingu ferðlaunanna. Í Húsey er einnig rekin ferðaþjónusta „þar sem einstaka náttúrufegurð, dýralíf og gestrisni er að finna og meðal annars hægt að stunda selaskoðun á hestbaki.“

„Kletturinn er veittur þeim einstaklingum sem um árabil hafa staðið í framlínu í ferðaþjónustu á Austurlandi og hafa með ósérhlífni og eljusemi stuðlað að framgangi og vexti atvinnugreinarinnar um langt árabil. Þeir eru bjargið sem ferðaþjónustan byggir á og eru öðrum fyrirmynd í að klífa örðuga hjalla til að ná handfestu á framtíðinni.“

Verðlaunin voru afhent á aðalfundi samtakanna á Eskifirði í síðustu viku. Mikil endurnýjun varð á stjórn þeirra því aðeins Albert Jónsson, Djúpavogi, varð eftir í stjórn. Díana Mjöll Sveinsdóttir, frá Tanna Travel á Eskifirði, er nýr formaður.

Ný stjórn Ferðamálasamtaka Austurlands:

Díana Mjöll Sveinsdóttir, Tanni Travel Eskifirði

Albert Jensson, Adventura Djúpavogi

Hákon Guðröðarson, Menningarfjelagið Norðfirði

Jóhann Jónsson, Austfar Seyðisfirði

Sævar Guðjónsson, Ferðaþjónustan Mjóeyri Eskifirði

Úr stjórn gengu:

Skúli Björn Gunnarsson (formaður), Skriðuklaustri Fljótsdal

Berglind Steina Ingvarsdóttir, Ferðaþjónustunni Mjóeyri Eskifirði,

Friðrik Árnason, Hótel Bláfelli Breiðdalsvík

Gunnlaugur Jónasson, Gistihúsinu Egilsstöðum.