Þrjár verslanir Samkaupa á Austurlandi orðnar að Kjörbúðum
Unnið er að því að breyta verslunum Samkaupa sem reknar hafa verið undir merkjum Strax og Úrvals í Kjörbúðirnar. Búið er að breyta þremur verslunum af fimm á Austurlandi.
Síðasta föstudag nóvember voru breyttar búðir opnaðar á Fáskrúðsfirði og Seyðisfirði og fyrir helgi var búðin á Eskifirði opnuð eftir breytingu.
Samkaup tók við verslunum Kaupfélags Héraðsbúa þegar KHB leitaði nauðasamninga árið 2009. Samkaup rekur í dag sex búðir á Austurlandi, Nettó á Egilsstöðum og fimm verslanir Samkaupa.
Eftir er að breyta verslununum á Norðfirði og Djúpavogi. Það á að gerast í byrjun næsta árs. Alls þarf að breyta um 30 verslunum um land allt.
Breytingarnar eru gerðar í kjölfar viðamikillar viðhorfskönnunar meðal um 4000 viðskiptavina Samkaupa og útkoman varð kjörbúðin.
Kjörbúðinni er ætlað að þjónusta bæjarbúa með því að bjóða gott úrval, lágt verð og ferskar vörur á hverjum stað. Með því vill Samkaup gera viðskiptavinum sínum um allt land kleift að versla daglega allar helstu nauðsynjavörur á samkeppnishæfu verði, að því er fram kemur í tilkynningu.
Við opnunina á Eskifirði. Frá vinstri: Ómar Valdimarsson framkvæmdarstjóri Samkaupa, Páll Björgvin Guðmundsson bæjarstjóri Fjarðabyggðar, Þórey Mjöll Fossberg Óladóttir verslunarstjóri á Eskifirði, Eydís Ásbjörnsdóttir bæjarfulltrúi og Gunnar Egill Sigurðsson forstöðumaður verslunarsviðs Samkaupa. Mynd: Gungör Gunnar Tamzok
