Gullver kominn í nýjan búning
Ísfisktogarinn Gullver NS hefur verið í slipp á Akureyri að undanförnu. Þar var sinnt almennu viðhaldi og auk þess var togarinn málaður og er nú kominn í bláan búning.
Á vefsíðu Síldarvinnslunnar segir að s.l. föstdagskvöld sigldi Gullver frá Akureyri áleiðis heim til Seyðisfjarðar og þangað kom hann á laugardag. Það sem mesta athygli vakti við komu skipsins til heimahafnar var breytingin á lit þess; Gullver hefur ávallt verið appelsínugulur að lit en nú er hann orðinn Síldarvinnslublár.
Á vefsíðunni er rætt við Rúnar L. Gunnarsson skipstjóra og spurði hvernig Seyðfirðingum litist á breytinguna á litnum.
„Mér heyrist flestir vera jákvæðir. Skipið er fallegt svona á litinn og menn hafa rifjað upp að gamli Gullver, fyrirrennari þessa skips, hafi einmitt verið svona á litinn,“ segir Rúnar.
Stefnt er að því að Gullver haldi til veiða síðdegis á morgun.
Mynd: Gullver NS kominn til Seyðisfjarðar, nýmálaður og fínn. Ljósm. Ómar Bogason/SVN.